शिव चालीसा
अयोध्यादास
भगवान शिव की अहैतुकी कृपा, दारिद्र्य-निवारण एवं मनोकामना सिद्धि हेतु रचित यह अत्यन्त लोकप्रिय स्तुति है। इसमें देवाधिदेव महादेव के पावन मस्तक पर गंगा, चन्द्रमा, नीलकण्ठ स्वरूप तथा त्रिपुरारी लीलाओं का भावपूर्ण गुणगान है।
॥ श्री गणेशाय नमः ॥
॥ ॐ नमः शिवाय ॥
॥ ॐ नमः शिवाय ॥
॥ १ ॥
जय गणेश गिरिजा सुवन,
मंगल मूल सुजान।
कहत अयोध्यादास तुम,
देहु अभय वरदान॥
॥ २ ॥
जय गिरिजापति दीन दयाला।
सदा करत संतन प्रतिपाला॥
॥ ३ ॥
भाल चन्द्रमा सोहत नीके।
कानन कुण्डल नागफनी के॥
॥ ४ ॥
अंग गौर शिर गंग बहाये।
मुण्डमाल तन क्षार लगाये॥
॥ ५ ॥
वस्त्र खाल बाघम्बर सोहै।
छवि को देखि नाग मुनि मोहै॥
॥ ६ ॥
मैना मातु की ह्वै दुलारी।
बाम अंग सोहत छवि न्यारी॥
॥ ७ ॥
कर त्रिशूल सोहत छवि भारी।
करत सदा शत्रुन क्षयकारी॥
॥ ८ ॥
नन्दि गणेश सोहै तहँ कैसे।
सागर मध्य कमल हैं जैसे॥
॥ ९ ॥
कार्तिक श्याम और गणराऊ।
या छवि को कहि जात न काऊ॥
॥ १० ॥
देवन जबहीं जाय पुकारा।
तब ही तुम प्रभु कष्ट निवारा॥
॥ ११ ॥
किया उपद्रव तारक भारी।
देवन सब मिलि तुमहिं जुहारी॥
॥ १२ ॥
तुरत षडानन आप पठायउ।
लवनिमेष महँ मारि गिरायउ॥
॥ १३ ॥
आप जलंधर असुर संहारा।
सुयश तुम्हार विदित संसारा॥
॥ १४ ॥
त्रिपुरासुर सन युद्ध मचाई।
सबहिं कृपा करि लीन बचाई॥
॥ १५ ॥
किया तपहिं भागीरथ भारी।
पुरब प्रतिज्ञा तासु पुरारी॥
॥ १६ ॥
दानिन महँ तुम सम कोउ नाहीं।
सेवक स्तुति करत सदाहीं॥
॥ १७ ॥
वेद माहि महिमा तुम गाई।
अकथ अनादि भेद नहिं पाई॥
॥ १८ ॥
प्रगटी उदधि मंथन में ज्वाला।
जरत सुरासुर भये विहाला॥
॥ १९ ॥
कीन्ही दया तहं करी सहाई।
नीलकण्ठ तब नाम कहाई॥
॥ २० ॥
पूजन रामचन्द्र जब कीन्हा।
जीत के लंक विभीषण दीन्हा॥
॥ २१ ॥
सहस कमल में हो रहे धारी।
कीन्ह परीक्षा तबहिं पुरारी॥
॥ २२ ॥
एक कमल प्रभु राखेउ जोई।
कमल नयन पूजन चहं सोई॥
॥ २३ ॥
कठिन भक्ति देखी प्रभु शंकर।
भये प्रसन्न दिए इच्छित वर॥
॥ २४ ॥
जय जय जय अनंत अविनाशी।
करत कृपा सब के घटवासी॥
॥ २५ ॥
दुष्ट सकल नित मोहि सतावै।
भ्रमत रहे मोहि चैन न आवै॥
॥ २६ ॥
त्राहि त्राहि मैं नाथ पुकारो।
यहि अवसर मोहि आन उबारो॥
॥ २७ ॥
ले त्रिशूल शत्रुन को मारो।
संकट से मोहि आन उबारो॥
॥ २८ ॥
मात-पिता भ्राता सब कोई।
संकट में पूछत नहिं कोई॥
॥ २९ ॥
स्वामी एक है आस तुम्हारी।
आय हरहु मम संकट भारी॥
॥ ३० ॥
धन निर्धन को देत सदा ही।
जो कोई जांचे सो फल पाहीं॥
॥ ३१ ॥
अस्तुति केहि विधि करैं तुम्हारी।
क्षमहु नाथ अब चूक हमारी॥
॥ ३२ ॥
शंकर हो संकट के नाशन।
मंगल कारण विघ्न विनाशन॥
॥ ३३ ॥
योगी यति मुनि ध्यान लगावैं।
शारद नारद शीश नवावैं॥
॥ ३४ ॥
नमो नमो जय नमः शिवाय।
सुर ब्रह्मादिक पार न पाय॥
॥ ३५ ॥
जो यह पाठ करे मन लाई।
ता पर होत शम्भु सहाई॥
॥ ३६ ॥
ॠनियां जो कोई हो अधिकारी।
पाठ करे सो पावनहारी॥
॥ ३७ ॥
पुत्र हीन कर इच्छा कोई।
निश्चय शिव प्रसाद तेहि होई॥
॥ ३८ ॥
पण्डित त्रयोदशी को लावे।
ध्यान पूर्वक होम करावे॥
॥ ३९ ॥
त्रयोदशी व्रत करै हमेशा।
तन नहीं ताके रहे कलेशा॥
॥ ४० ॥
धूप दीप नैवेद्य चढ़ावै।
शंकर सम्मुख पाठ सुनावै॥
॥ ४१ ॥
जन्म जन्म के पाप नसावै।
अन्त धाम शिवपुर में पावै॥
॥ ४२ ॥
कहैं अयोध्यादास सब,
आस रूप शिव धार।
लाज राखि शिव शम्भु अब,
करहु भवन से पार॥
॥ ४३ ॥
नित नेम करि प्रातः ही,
पाठ करौ चालीस।
तुम मेरी मनकामना,
पूर्ण करो जगदीश॥